*ସର୍ବକାଳିନ ରେକର୍ଡ ଭାଙ୍ଗି ତଳମୁହାଁ ହେଲା ଟଙ୍କା; ଶକ୍ତିଶାଳି ହେଲା ଡଲାର*
ଭାରତୀୟ ଟଙ୍କା ଶୁକ୍ରବାର ଦିନ ଆମେରିକୀୟ ଡଲାର ବିପକ୍ଷରେ ନୂତନ ରେକର୍ଡ ସ୍ଥାପନ କରି ନିମ୍ନସ୍ତର ୮୮.୨୭କୁ ଖସିଛି। ଯାହା ଗୁରୁବାରର ୮୮.୧୫ ତୁଳନାରେ ୧୨ ପଇସା କମ୍ ରହିଛି। ଏହି ହ୍ରାସର ମୁଖ୍ୟ କାରଣ ହେଉଛି ବିଦେଶୀ ପୁଞ୍ଜି ଉଠାଣ ଏବଂ ଆମେରିକାର ଭାରତୀୟ ପଣ୍ୟ ଉପରେ ଲାଗୁ କରାଯାଇଥିବା ନୂତନ ଶୁଳ୍କ ସମ୍ପର୍କରେ ବିଶ୍ୱ ବଜାରରେ ଉଦ୍ଭବ ହୋଇଥିବା ଚିନ୍ତା। ଏହା ସତ୍ତ୍ୱେ ଭାରତ ସରକାରଙ୍କ ଦ୍ୱାରା ଘୋଷିତ ଜିଏସଟି ସଂସ୍କାର ଯାହା ଚାରୋଟି ସ୍ଲାବକୁ ଦୁଇଟି (୫% ଏବଂ ୧୮%) ଏବଂ ବିଳାସପୂର୍ଣ ଓ କ୍ଷତିକାରକ ପଣ୍ୟ ଉପରେ 40% ଶୁଳ୍କ ଲାଗୁ କରିଛି, ତାହା ଟଙ୍କାର ପତନକୁ ରୋକିବାରେ ସଫଳ ହୋଇପାରିନାହିଁ।
ବିଶ୍ୱ ଅର୍ଥନୀତିରେ ଅନିଶ୍ଚିତତା, ଆମେରିକାରେ ନିମ୍ନମୁଖୀ ଶ୍ରମ ବଜାର ତଥ୍ୟ ଏବଂ ଆମେରିକୀୟ ଫେଡେରାଲ ରିଜର୍ଭର ସମ୍ଭାବ୍ୟ ସୁଧ ହାର ହ୍ରାସ ଆଶା ହେତୁ ଡଲାରର ଚାହିଦା ବୃଦ୍ଧି ପାଇଛି। ମେକ୍ଲାଇ ଫାଇନାନସିଆଲ ସର୍ଭିସେସର ଉପ-ମୁଖ୍ୟ କାର୍ଯ୍ୟନିର୍ବାହୀ ରିତେଶ ଭଂଶାଲୀ କହିଛନ୍ତି, “ଆମେରିକୀୟ ରାଷ୍ଟ୍ରପତି ଟ୍ରମ୍ପଙ୍କ ନୂତନ ଶୁଳ୍କ ହେତୁ ବାଣିଜ୍ୟ ସମ୍ଭାବନା ଅନିଶ୍ଚିତ ହୋଇପଡ଼ିଛି, ଯାହା ଟଙ୍କାକୁ ଆହୁରି ଅଧିକ ଦୁର୍ବଳ କରିଦେଇଛି।”
ଏହା ସହିତ, ବିଦେଶୀ ସଂସ୍ଥାଗତ ନିବେଶକ (FII) ମାନେ ଭାରତୀୟ ଇକ୍ୟୁଟି ବଜାରରୁ ନିରନ୍ତର ପୁଞ୍ଜି ପ୍ରତ୍ୟାହାର କରୁଛନ୍ତି। ଯାହା ଟଙ୍କା ଉପରେ ଅଧିକ ଚାପ ସୃଷ୍ଟି କରିଛି। ବିଶେଷଜ୍ଞମାନେ ଆଶା କରୁଛନ୍ତି ଯେ ବିଶ୍ୱ ବାଣିଜ୍ୟ ଏବଂ ମୁଦ୍ରା ନୀତି ସ୍ପଷ୍ଟ ନହେବା ପର୍ଯ୍ୟନ୍ତ ଟଙ୍କାର ଅସ୍ଥିରତା ଜାରି ରହିବ।
ତଥାପି, ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (RBI) ଟଙ୍କାକୁ ସ୍ଥିର ରଖିବା ପାଇଁ ବିଦେଶୀ ମୁଦ୍ରା ବଜାରରେ ହସ୍ତକ୍ଷେପ କରୁଛି। ବିଶେଷଜ୍ଞମାନେ କହୁଛନ୍ତି ଯେ ଯଦି ଆମେରିକୀୟ ଶୁଳ୍କ ନୀତିରେ କିଛି ସହଜୀକରଣ ହୁଏ କିମ୍ବା ବିଶ୍ୱ ବଜାରରେ ଅନ୍ୟ ସକାରାତ୍ମକ ପରିବର୍ତ୍ତନ ଦେଖାଦିଏ, ତେବେ ଟଙ୍କା କିଛି ପରିମାଣରେ ସୁଧୁରିପାରେ।
ଡ଼ ପ୍ରଦୀପ୍ତ କୁମାର ମିଶ୍ର, ସ୍ବତନ୍ତ୍ର ପ୍ରତିନିଧି ଓଡ଼ିଶା
إرسال تعليق