ଏବେବି ଅଭିଶପ୍ତ ଲାଞ୍ଜିଗଡ଼ ଶିଳ୍ପାଞ୍ଚଳ
ବେଦାନ୍ତର ବିଷାକ୍ତ ଧୂଳିଧୁଆଁରେ ପୋତି ହେଉଛି ପାରିପାର୍ଷିକ ଅଞ୍ଚଳ l
ପୁଣି ନିୟମଗିରି ପାହାଡରୁ ବକ୍ସାଇଟ ଖନନ ପାଇଁ ଗ୍ରାମସଭା ପ୍ରୟାସ
ଏହାକୁ ନେଇ ଅଞ୍ଚଳରେ ପୁଣି ଅସନ୍ତୋଷର
ଲାଞ୍ଜିଗଡ଼,:କଳାହାଣ୍ଡି ଜିଲ୍ଲା ଲାଞ୍ଜିଗଡ ବ୍ଳକର ଦୁର୍ଗମ ଅଞ୍ଚଳବାସୀ ସରକାରଙ୍କ ମୌଳିକ ସୁବିଧାରୁ ବଞ୍ଚିତ ହେଉଥିବାବେଳେ ବର୍ତ୍ତମାନ ସାମ୍ନାକୁ ଆସିଛି ବେଦାନ୍ତ ଭଳି କମ୍ପାନୀ ଥିବା ଶିଳ୍ପାଞ୍ଚଳ ଲାଞ୍ଜିଗଡ଼ର ଚିତ୍ର । ବେଦାନ୍ତ ଆସିବା ପୂର୍ବରୁ ଲାଞ୍ଜିଗଡ଼ ବାସୀ ଅନେକ ସ୍ବପ୍ନ ଦେଖୁଥିଲେ । ଆମ ଗାଁରେ କାରଖାନା ହେବ, ଆମ ପିଲାଏ ପାଠ ପଢ଼ିବେ, ଭଲ ମଣିଷ ହେବେ ଓ ବେଦାନ୍ତ କାରଖାନାରେ ଚାକିରି କରିବେ। ହେଲେ ସବୁ ସ୍ୱପ୍ନ ଆଖ୍ ପିଛୁଳାକେ ଧୂଳିସାତ ହୋଇଗଲା । ବେଦାନ୍ତ କମ୍ପାନୀ ବାହାର ରାଜ୍ୟ ଲୋକଙ୍କୁ ଚାକିରି ଦେଉଥିବା ବେଳେ ଏହା ବିରୋଧରେ ଅନେକ ଅଭିଯୋଗ, ଆନ୍ଦୋଳନ ହେଉଥିଲେ ମଧ୍ୟ ଅଞ୍ଚଳ ବାସୀଙ୍କୁ କୌଣସି ଗୁରୁତ୍ୱ ଦେଲା ନାହିଁ । ଶେଷରେ ବାଧ୍ଯ ହୋଇ ସ୍ଥାନୀୟ ପାଠୁଆ ପିଲା ବାହାରକୁ ଯାଇ ଦାଦନ ଖଟୁଛନ୍ତି। ୫ହଜାର ରୁ ଅଧିକ ଜନସଂଖ୍ୟା ବିଶିଷ୍ଟ ଲାଞ୍ଜିଗଡ଼ରେ ଯାତାୟତ ପାଇଁ ଭଲ ରାସ୍ତା ଖଣ୍ଡେ ନାହିଁ । ସ୍ବାସ୍ଥ୍ୟସେବା ବି ଅପହଞ୍ଚ ଗରିବ ହିତାଧିକାରୀଙ୍କ ପାଇଁ ସରକାରଙ୍କ ଦ୍ଵାରା ଦିଆଯାଉଥିବା ପିଡିଏସ୍ ଚାଉଳ ହିଁ ଗରିବଙ୍କ ଭରସା। ଅନେକ ସ୍ୱପ୍ନ ଦେଖାଇ ବେଦାନ୍ତ କମ୍ପାନୀ କାରଖାନା ନିର୍ମାଣ ପାଇଁ ଲାଞ୍ଜିଗଡ଼ ଅଞ୍ଚଳବାସୀଙ୍କ ଠାରୁ ଜାଗା ନେଲା । ହେଲେ କିଞ୍ଚିତ୍ ମାତ୍ରାରେ କ୍ଷତିପୂରଣ ରାଶି ଦେଇ ଚୁପ୍ ବସିଲା। ବିଜ୍ଞାପନ, ହୋଡିଂ ଓ ବ୍ୟାପକ ପ୍ରଚାର ପ୍ରସାର କରି ବିକାଶର ଡିମଡିମ ପିଟୁଛି ବେଦାନ୍ତ କର୍ତ୍ତୃପକ୍ଷ। ହେଲେ ଲାଞ୍ଜିଗଡ ବେଦାନ୍ତ ରେଡ଼ମଡ଼ଫଣ୍ଡ,ପ୍ରସେସ ୱାଟର, ଆସଫଣ୍ଡର ପାରିପାର୍ଷିକ ୩୦୦ ଶହରୁ ୫୦୦ ମିଟର ପରିଧାନରେ ବସନ୍ତ ପଡ଼ା, ବନ୍ଦଗୁଡା, କପା ଗୁଡା,ବୁଣ୍ଡେଲ,ଚଣାଳୀମା, କେନ୍ଦୁଗୁଡା, ସମେତ ଅନେକ ଗୁଡ଼ି ଗାଁରେ ବେଦାନ୍ତର ରେଡ଼ମୋଡ଼ ପଣ୍ଡର ବିଷାକ୍ତ ଧୂଳି ଓ ଆସପଣ୍ଡର ପାଉଁଶ ଉଡି ପୋତି ହେଉଥିବା ବେଳେ ଅନେକ ଲୋକ ଚର୍ମ ରୋଗ ରେ ଆକ୍ରାନ୍ତ ହେଉଥିବା ଅଭିଯୋଗ ହେଉଛି।ଏହି ଗାଁ ମାନଙ୍କ ମଧ୍ୟରୁ ବଶନ୍ତ ପଡାରେ ରେଡ଼ମୋଡ଼ ଫଣ୍ଡର ବିଷାକ୍ତ ପାଣି ଓ ଧୂଳି ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି।ବିଭିନ୍ନ ରୋଗରେ ଆକ୍ରାନ୍ତ ହୋଇ ଲୋକଙ୍କ ମୃତ୍ୟୁ ଘଟିଥିବା ଦେଖିବାକୁ ମିଳୁଛି।ଏହି ଘଟଣା ସାମ୍ନାକୁ ଆସିବା ପରେ ୨୦୧୯ ମସିହାରେ ଗାଁ ଦୂଷିତକୁ ନେଇ ବସନ୍ତ ପଡା ପ୍ରତ୍ୟେକ ପରିବାରକୁ ୬ଶହ ଟଙ୍କା କ୍ଷତି ପୂରଣ ଦିଆ ଯାଇଥିଲା।ବର୍ତ୍ତମାନ ଆଜିକୁ ୧ ବର୍ଷ ହେଲା ସେହି ରାଶି ବଢିକି ୧୫୦୦ ଟଙ୍କା ଦିଆଯାଇଛି ବୋଲି ବସନ୍ତପଡା ବାସୀ କହିଛନ୍ତି।କିଛି ଲୋକଙ୍କୁ ହାତମୁଠା କରି ବର୍ତ୍ତମାନ ବସନ୍ତପଡା ଗାଁରେ କୌଣସି ବିକାଶ ମୂଳକ କାମ କରୁନାହିଁ ବେଦାନ୍ତ।ଅଭିଯୋଗ ପରେବି ବେଦାନ୍ତ କର୍ତ୍ତୃପକ୍ଷ କର୍ଣ୍ଣପାତ କରୁନଥିବା ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବେଦାନ୍ତ କମ୍ପାନୀ ଆସିଲା ଦିନଠାରୁ ଅଞ୍ଚଳବାସୀଙ୍କୁ ଅନେକ ପ୍ରତିଶ୍ରୁତି ଦେଉଛି, ହେଲେ ଲାଞ୍ଜିଗଡ଼ ପାରିପାର୍ଷିକ ଅଞ୍ଚଳକୁ ଦେଖିଲେ ସହଜରେ ଅନୁମାନ କରାଯାଇ ପାରେ କେତେ ବିକାଶ ହୋଇଛି I କମ୍ପାନୀ ତା' ନିଜ କାରଖାନାକୁ ଯିବା ରାସ୍ତାକୁ ସଜାଡ଼ି ପାରୁନାହିଁ । ଲାଞ୍ଜିଗଡ଼ଠାରୁ ବେଦାନ୍ତ କାରଖାନା ପର୍ଯ୍ୟନ୍ତ ଅତ୍ୟନ୍ତ ଦୟନୀୟ ଅବସ୍ଥା। ସେହି ରାସ୍ତାରେ ଜିଲ୍ଲାର ଅନେକ ପଦାଧିକାରୀ ଯିବା ଆସିବା କରୁଛନ୍ତି ହେଲେ ସେମାନଙ୍କ ଦୃଷ୍ଟି ମଧ୍ୟ ନପଡ଼ିବା ଦୁର୍ଭାଗ୍ୟଜନକ l ବେଦାନ୍ତ ୨୦୦୩ମସିହାରେ ସ୍ଥାପନ ହୋଇଥିବା ବେଳେ ଖଣିଖନନ ପାଇଁ ଅନୁମତି ନ ମିଳିଥିବାରୁ କମ୍ପାନୀ ପୂର୍ଣ୍ଣ କାର୍ଯ୍ୟକ୍ଷମ ହୋଇପାରି ନାହିଁ lଏହାକୁ ନେଇ ଲାଞ୍ଜିଗଡ ପାରିପାର୍ଶ୍ବିକ ଅଞ୍ଚଳବାସୀ ବେଦାନ୍ତକୁ ବକ୍ସାଇଟ ଯୋଗାଇ ଦେବା ପାଇଁ ଗତ ୨୨ ତାରିଖରେ ଏକ ବିଶ୍ୱାଳ ଶୋଭାଯାତ୍ରାରେ ବାହାରି ଲାଞ୍ଜିଗଡ ବିଡିଓ ଶଶାଙ୍କ ପାତ୍ରଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଥିଲେ।ବେଦାନ୍ତ କମ୍ପାନୀକୁ କଞ୍ଚାମାଲ ଯୋଗାଇ ଦେଲେ କମ୍ପାନୀ ଉପରେ ନିର୍ଭର ଶୀଳ ସ୍ଥାନୀୟ ଲୋକମାନେ ଉପକୃତ ହୋଇ ପାରିବେ ବୋଲି ଦାବି ପତ୍ରରେ ଉଲ୍ଲେଖ ଥିଲା।ଏହାକୁ ନେଇ ସରକାର ନିଜ ପ୍ରୟାସ ଜାରି ରଖିଥିବା ବେଳେ ବର୍ତ୍ତମାନ ଅଞ୍ଚଳରେ ଉଲଟା ଦେଖିବାକୁ ମିଳୁଛି।୨୦୦୩ ମସିହାରେ ଅଞ୍ଚଳରେ ବେଦାନ୍ତ କମ୍ପାନୀ ସ୍ଥାପନ ହୋଇ ଅଞ୍ଚଳରେ ବିକାଶର ମିଥ୍ୟା ପ୍ରତିଶ୍ରୁତି ଦେଇ ଚାଲିଥିବା ବେଳେ ଗମନାଗମନ,ପାନୀୟ ଜଳ,ଉଚ୍ଚ ଶିକ୍ଷା,ସ୍ୱାସ୍ଥ୍ୟ,ବିଜୁଳି ଭଳି ଅଞ୍ଚଳରେ ଘୋର ସମସ୍ୟା ରହିଛି। ଏହା ବ୍ୟତୀତ ସ୍ଥାନୀୟ ନିୟମଗିରି ପାହାଡରୁ କଞ୍ଚାମାଲ ବକ୍ସାଇଟ ଖୋଲିବା ପାଇଁ କମ୍ପାନୀ ତାର ପ୍ରୟାସ ଆରମ୍ଭ କରିଥିବା ବେଳେ ଏହାକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ଘୋର ବିରୋଧ ସତ୍ତ୍ୱେ ପ୍ରଶାସନ ପକ୍ଷରୁ ଗ୍ରାମସଭାର ଆୟୋଜନ କରାଯାଇଥିଲା।ଗ୍ରାମସଭା ତାଲିକାରେ ଥିବା ଶତ ପ୍ରତିଶତ ଗାଁ କମ୍ପାନୀ ବିରୁଦ୍ଧରେ ନିଜ ମତ ଦେଇଥିଲେ।ଏହାକୁ ନେଇ ୨୦୧୦ ମସିହାରେ ମାନ୍ୟବର ସୁପ୍ରିମକୋର୍ଟ ପକ୍ଷରୁ ନିୟମଗିରି ପାହାଡରୁ ବକ୍ସାଇଟ ବେଦାନ୍ତ କମ୍ପାନୀ କୁ ଦିଆ ଯିବ ନାହିଁ ବୋଲି ରାୟ ପ୍ରକାଶ କରିଥିଲେ।ବର୍ତ୍ତମାନ ଏବେ ନିଜ ସ୍ୱାର୍ଥ ହାସଲ ପାଇଁ ଲାଞ୍ଜିଗଡ ଅଞ୍ଚଳର କିଛି ଲୋକ ଓ ଜନପ୍ରତିନିଧି ମାନେ ପୁଣି ନିୟମଗିରି ପାହାଡ ରୁ ବେଦାନ୍ତକୁ କଞ୍ଚାମାଲ ଯୋଗାଇ ଦେବା ପାଇଁ ବିଡ଼ିଓ ଙ୍କ ଜରିଆରେ ଏକ ସ୍ମାରକ ପତ୍ର ଦେଇଛନ୍ତି l ହେଲେ ଲାଞ୍ଜିଗଡ ଅଞ୍ଚଳର ୯୦ ପ୍ରତିଶତ ଲୋକ ବେଦାନ୍ତ କୁ ଖଣିଯୋଗାଇ ନ ଦିଆଯାଉ ବୋଲି ବିରୋଧ କରୁ ଥିବା ଚିତ୍ର ସାମ୍ନାକୁ ଆସୁଛି l ବେଦାନ୍ତ ସ୍ବାସ୍ଥ୍ୟକ୍ଷେତ୍ରରେ ଉନ୍ନତି ଆଣିବା ପାଇଁ ବେଦାନ୍ତ କମ୍ପାନୀ ତରଫରୁ ଏକ ଡାକ୍ତରଖାନା ପ୍ରତିଷ୍ଠା କରାଯାଇଛି। ତାହା ନାମକୁ ମାତ୍ର ସାମାନ୍ୟ ଜ୍ଵର ହେଲେ ସରକାରୀ ଡାକ୍ତରଖାନାକୁ ସ୍ଥାନାନ୍ତର କରି ଦିଆଯାଉଥିବା ଅଭିଯୋଗ ହେଉଛି । ବେଦାନ୍ତ ଡାକ୍ତରଖାନାରେ ଅନେକ ବିଶେଷଜ୍ଞ ଥିବା କୁହାଯାଉଛି, ହେଲେ ମାସରେ ଗୋଟିଏରୁ ଦୁଇଥର ଆସୁଛନ୍ତି। ବର୍ତ୍ତମାନ ଦୁଇ ବର୍ଷ ହେଲା ଦୁର୍ଗମ ଅଞ୍ଚଳର ଲୋକଙ୍କୁ ଚିକିତ୍ସା ପାଇଁ କିଛି ଫିଜ ଆଦାୟ କରାଯାଉଛି। ଅଞ୍ଚଳରେ ଉଚ୍ଚ ଶିକ୍ଷାଲାଭ କରିବା ପାଇଁ ଅନେକ ମେଧାବୀ ଛାତ୍ରଛାତ୍ରୀ ଅଛନ୍ତି ।ମାଟ୍ରିକ, ଯୁକ୍ତ-୨ ପାସ ପରେ ସ୍ନାତକ ଶିକ୍ଷା ପାଇଁ ଦୂରଦୁରାନ୍ତରକୁ ଯାଇ ନ ପାରି ଏକ ପ୍ରକାର ଶିକ୍ଷିତ ବେକାରୀ ଭାବେ ଅଞ୍ଚଳରେ ଛାତ୍ରଛାତ୍ରୀ ମାନେ ନିଜକୁ ଅନୁଭବ କରୁଛନ୍ତି।ଏଣୁ କୌଣସି କାମଧନ୍ଦା ନପାଇ ଲାଞ୍ଜିଗଡ ବ୍ଳକର ଶହ ଶହ ଶିକ୍ଷିତ ଯୁବକ ଯୁବତୀ ପ୍ରତିବର୍ଷ ଦାଦନ ମୁହାଁ ହେବା ଚିନ୍ତା ଜନକ ସୃଷ୍ଟି କରିଛି।ଲାଞ୍ଜିଗଡ ଏକ ଶିଳ୍ପାଞ୍ଚଳ ଅଞ୍ଚଳ ଓ ଅନ୍ୟାନ୍ୟ ଅନୁଷ୍ଠାନ ଥିଲେହେଁ ଅଞ୍ଚଳର ଯୁବକ ଯୁବତୀ ଉଚ୍ଚ ଶିକ୍ଷା ତଥା ବୈଷୟିକ ଶିକ୍ଷାରୁ ବଞ୍ଚିତ ଥିବାରୁ ନିଜ ଅଞ୍ଚଳରେ ନିଯୁକ୍ତି ପାଇବାରେ ସୁଯୋଗ ମିଳିପାରୁନାହିଁ।ଏଣୁ ଶତାଧିକ ଶିକ୍ଷିତ ଯୁବକ ଯୁବତୀ ମାନେ କେରଳ, କର୍ଣ୍ଣାଟକ, ତାମିଲନାଡୁ, ମହାରାଷ୍ଟ୍ର, ଉତ୍ତରପ୍ରଦେଶ,ଛତିଶଗଡ଼, ଗୁରୁରାଟ ଆଦି ବିଭିନ୍ନ ରାଜ୍ୟକୁ ଦାଦନ ଖଟିବାକୁ ଯାଇଥିବା ଅଭିଯୋଗ ହୋଇଛି।ଏହାକୁ ଦୃଷ୍ଟିରେ ରଖି ଲାଞ୍ଜିଗଡ ଠାରେ ଡିଗ୍ରୀ ମହାବିଦ୍ୟାଳୟ ଓ ଆଇଟିଆଇ ସ୍ଥାପନ ପାଇଁ ଅଞ୍ଚଳବାସୀ ବାରମ୍ବାର ଦାବି କରିବା ପରେ ବେଦାନ୍ତ କମ୍ପାନୀ ପକ୍ଷରୁ ଲାଞ୍ଜିଗଡ ନିକଟସ୍ଥ କେନ୍ଦୁଗୁଡା ଛକ ନିକଟରେ ଡିଗ୍ରୀ କଲେଜ ପାଇଁ ଜାଗା ଚିହ୍ନଟ କରି ପାଚିରୀ ନିର୍ମାଣ ମଧ୍ୟ ସରିଛି।ସେହିପରି ଜଗନ୍ନାଥପୁର ମୌଜାରେ ଆଜିକୁ ୧୦ ବର୍ଷ ହେଲା ଆଇଟିଆଇ ସ୍ଥାପନ ପାଇଁ ଜମି ଚିହ୍ନଟ କରାଯାଇଥିବାବେଳେ ପ୍ରସ୍ତାବିତସ୍ଥାନର ଆଇଟିଆଇ ସ୍ଥାପନ ହୋଇ ପାରୁନାହିଁ।ଯାହା ଫଳରେ ଅର୍ଥ ଅଭାବ ଯୋଗୁଁ ବାହାରକୁ ଯାଇ ଶିକ୍ଷାଲାଭ କରିବା ସମ୍ଭବ ହେଉନାହିଁ । ଏଭଳି ଅନେକ ସମସ୍ୟାକୁ ନେଇ ଅଞ୍ଚଳରେ ଆନ୍ଦୋଳନର ଦାନା ବାନ୍ଧୁଥିବା ବେଳେ ଆଉ କେତେଦିନ ପରେ ପ୍ରଶାସନ ଓ କମ୍ପାନୀ କର୍ତ୍ତୃପକ୍ଷ ଏଠାକାର ସମସ୍ୟା ପ୍ରତି ଦୃଷ୍ଟିଦେବେ ବୋଲି ଅଞ୍ଚଳରେ ଚର୍ଚ୍ଚା ହେଉଛି।
ଡ଼ ପ୍ରଦୀପ୍ତ କୁମାର ମିଶ୍ର, ସ୍ବତନ୍ତ୍ର ପ୍ରତିନିଧି ଓଡ଼ିଶା
إرسال تعليق