ଡାକ୍ତର ହେବେ ଗଜପତି ର ଜନଜାତି ପୁଅ ନୀର

 ଡାକ୍ତର ହେବେ ଗଜପତି ର ଜନଜାତି ପୁଅ ନୀର  ।

 

ଗଜପତି(ମନୋଜ ପାଢୀ)ଜିଲ୍ଲାର ଜନଜାତି ବହୁଳ ବନ ପାହାଡ଼ ଘେରା ଦୁର୍ଗମ ପଲ୍ଲୀର ବାପା,ମାଆ ଛେଉଣ୍ଡ ଗରିବ ଜନଜାତି ପୁଅ ନୀର ମଲିକ ଡାକ୍ତର ହେବେ।ସେ ପୁରୀ ସରକାରୀ ଶ୍ରୀ ଜଗନ୍ନାଥ ମେଡିକାଲ କଲେଜରେ ଏମବିବିଏସ୍ ପାଠ ପଢିବା ପାଇଁ ମନୋନୀତ ହୋଇଛନ୍ତି।ଏହି ଖବର ସମ୍ପୃକ୍ତ ଅଞ୍ଚଳରେ ପ୍ରଚାର ହେବା ପରେ ଅଞ୍ଚଳର ସମସ୍ତ ଗ୍ରାମବାସୀଙ୍କ ଠାରେ ଆନନ୍ଦର ଲହରୀ ଖେଳି ଯାଇଛି।ଏଠାରେ ସୂଚନା ଯୋଗ୍ୟ ଯେ ସର୍ବଭାରତୀୟ ନିଟ୍ ପରୀକ୍ଷାରେ ଗଜପତି ଜିଲ୍ଲା ମୋହନା ବ୍ଳକ ଅଡବା ପଞ୍ଚାୟତ ଡୁମିଗୁଡ଼ା ଗାଁର ଗରିବ ଜନଜାତି ପୁଅ ନିର ମଲ୍ଲିକ ୪୧୫ ମାର୍କ ରଖ୍ ସଫଳତାର ସହ ଉତ୍ତୀର୍ଣ୍ଣ ହୋଇଥିଲେ।ବାପା ସୈନ୍ୟ ମଲ୍ଲିକ ଓ ମାଆ ରମ୍ଭୁଆଳୁ ମଲ୍ଲିକଙ୍କ ଦୁଇ ପୁଅ ନୀର ଓ ପୀର।ଆର୍ଥିକ ସମସ୍ୟା ଯୋଗୁଁ ପାଠ ପଢିନଥିଲେ।ଜଣେ ଗରିବ ଜନଜାତି ପୁଅର ସଫଳତା ଦେଖି ବିପଦର ବନ୍ଧୁ ସଙ୍ଗଠନ ତାଙ୍କୁ ଆର୍ଥିକ ସହାୟତା ସହ ବ୍ରହ୍ମପୁର ଆର୍ଯ୍ୟଭଟ୍ଟ ଫାଉଣ୍ଡେସନରେ ନିଟ୍ ପାଇଁ କୋଟିଂ ସୁବିଧା କରାଇଥିଲେ। ବାପା,ମାଆ ଉଭୟ ଆରପାରିକୁ ଚାଲିଯାଇଥିବା ବେଳେ ନୀରର ବଡ଼ ଭାଇ ପୀର ଦାଦନ ଖଟି ରୋଜଗାର କରିବା ସହ ଭାଇ ନୀର କୁ ପାଠ ପଢାଉ ଥିଲେ।ବଡ଼ ଭାଇ ଦୁଃଖ କଷ୍ଟରେ ସାନ ଭାଇ ନୀର କୁ ପାଠ ପଢ଼ାଇବା ସହ ବିପଦର ବନ୍ଧୁ ସଂଗଠନ ଓ ଆଯ୍ୟଭଟ୍ଟ ଫାଉଣ୍ଡେସନ ସହାୟତାରେ ନିଟ୍ ପରୀକ୍ଷାରେ ସଫଳ ଭାବେ ଉତ୍ତୀର୍ଣ୍ଣ ହୋଇ ପୁରୀ ଶ୍ରୀଜଗନ୍ନାଥ ମେଡିକାଲ କଲେଜ ରେ ଏମବିବିଏସ ପାଠ ପଢିବା ପାଇଁ ମନୋନୀତ ହୋଇଛନ୍ତି। ଗରିବ ଜନଜାତି ଯୁବକ ନୀର ନିଜ ବଡ଼ ଭାଇ ସହ ଉପରୋକ୍ତ ଦୁଇ ସଂଗଠନ ନିକଟରେ କୃତଜ୍ଞତା ଜ୍ଞାପନ କରି କହିଛନ୍ତି।ଏମବିବିଏସ ଡିଗ୍ରୀ ହାସଲ ପରେ ଗ୍ରାମାଞ୍ଚଳ ଲୋକଙ୍କ ସେବା ପାଇଁ ମୋ ଡାକ୍ତରୀ ଜୀବନର ସମସ୍ତ ସମୟ ବିନିଯୋଗ କରିବି ବୋଲି ନୀର ନିଜ ପ୍ରତିକ୍ରିୟା ରେ ପ୍ରକାଶ କରିଛନ୍ତି।

ମଣିଭଦ୍ରା ଖବର, ଗଜପତି