ଡ. ପ୍ରଦୀପ କୁମାର ପାଣିଗ୍ରାହୀ, ସାଂସଦ (ଲୋକସଭା), ବ୍ରହ୍ମପୁର
ଆସନ୍ତା ୨୭ ତାରିଖରେ ଧବଳେଶ୍ୱର ମନ୍ଦିର ପଡ଼ିଆରେ ନୂଆ ଗୋଳାବନ୍ଧ ପୁନର୍ବାସ ଓ ଥଇଥାନ (R&R) ପ୍ୟାକେଜ୍ ଏବଂ ଛେଳିଗଡ଼ ପ୍ରକଳ୍ପର ପଟ୍ଟା ବଣ୍ଟନ କରିବେ ମାନ୍ୟବର ମୁଖ୍ୟମନ୍ତ୍ରୀ ଓ ରାଜସ୍ୱ ମନ୍ତ୍ରୀ: ହାର୍ଦ୍ଦିକ କୃତଜ୍ଞତା ଜଣାଇଲେ ବ୍ରହ୍ମପୁର ସାଂସଦ
ବ୍ରହ୍ମପୁର / ଭୁବନେଶ୍ୱର:
ଗଞ୍ଜାମ ଓ ଗଜପତି ଜିଲ୍ଲାବାସୀଙ୍କ ବହୁ ପ୍ରତୀକ୍ଷିତ ତଥା ଦୀର୍ଘ ବର୍ଷ ଧରି ପଡ଼ିରହିଥିବା ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟ ସରକାର ଏକ ଯୁଗାନ୍ତକାରୀ ନିଷ୍ପତ୍ତି ଗ୍ରହଣ କରିଛନ୍ତି। ନୂଆ ଗୋଳାବନ୍ଧ ଗ୍ରାମର ପ୍ରଭାବିତ ନୋଳିଆ ପରିବାରମାନଙ୍କ ପାଇଁ ପୁନର୍ବାସ ଓ ଥଇଥାନ (R&R) ପ୍ୟାକେଜ୍ ମଞ୍ଜୁର ହେବା ସହ ଛେଳିଗଡ଼ ମଧ୍ୟମ ଜଳସେଚନ ପ୍ରକଳ୍ପ (Chelligada Project) ଦ୍ୱାରା ପ୍ରଭାବିତ ହିତାଧିକାରୀମାନଙ୍କୁ ଭୂ-ଅଭିଲେଖ (RoR/ପଟ୍ଟା) ପ୍ରଦାନ ପ୍ରକ୍ରିୟା ଆରମ୍ଭ ହେବାକୁ ଯାଉଛି।
ଆସନ୍ତା ୨୭ ତାରିଖ ଦିନ ପ୍ରସିଦ୍ଧ ଶ୍ରୀ ଧବଳେଶ୍ୱର ମନ୍ଦିର ନିକଟସ୍ଥ ପଡ଼ିଆରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଏବଂ ମାନ୍ୟବର ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ଶ୍ରୀ ସୁରେଶ ପୂଜାରୀ ସ୍ୱୟଂ ଉପସ୍ଥିତ ରହି ଏହି ଐତିହାସିକ ଆର୍ଥିକ ସହାୟତା ପ୍ୟାକେଜ୍ ଏବଂ ଜମି ପଟ୍ଟା ବଣ୍ଟନ କରିବେ।
ଏହି ଅବସରରେ ବ୍ରହ୍ମପୁର ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ କହିଛନ୍ତି:
"ଏହି ଦୁଇଟି ଗୁରୁତ୍ୱପୂର୍ଣ୍ଣ ପ୍ରସଙ୍ଗର ସମାଧାନ ନିମନ୍ତେ ଆମେ ନିରନ୍ତର ଭାବେ ରାଜ୍ୟ ସରକାର ଏବଂ ପ୍ରଶାସନ ସହିତ ଆଲୋଚନା ଜାରି ରଖିଥିଲୁ। ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଏବଂ ରାଜସ୍ୱ ମନ୍ତ୍ରୀ ଶ୍ରୀ ସୁରେଶ ପୂଜାରୀ ମହାଶୟ ସ୍ଥାନୀୟ ଜନସାଧାରଣଙ୍କ ଦାବିକୁ ଅତ୍ୟନ୍ତ ସମ୍ବେଦନଶୀଳତାର ସହ ଗ୍ରହଣ କରି ଏହାକୁ ତୁରନ୍ତ ଅନୁମୋଦନ କରିଛନ୍ତି। ଉଭୟ ନେତୃବୃନ୍ଦ ନିଜେ ଧବଳେଶ୍ୱର ପୀଠକୁ ଆସି ଲୋକଙ୍କ ହାତରେ ଏହି ପ୍ୟାକେଜ୍ ଓ ପଟ୍ଟା ଅର୍ପଣ କରିବାକୁ ଯାଉଥିବାରୁ ମୁଁ ସମଗ୍ର ସଂସଦୀୟ କ୍ଷେତ୍ରବାସୀଙ୍କ ତରଫରୁ ମାନ୍ୟବର ମୁଖ୍ୟମନ୍ତ୍ରୀ, ରାଜସ୍ୱ ମନ୍ତ୍ରୀ, ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନକୁ ଅନ୍ତରରୁ ହାର୍ଦ୍ଦିକ କୃତଜ୍ଞତା ଓ ଧନ୍ୟବାଦ ଜଣାଉଛି।"
ଏହି ନିଷ୍ପତ୍ତି ଫଳରେ ଗୋଳାବନ୍ଧ ଅଞ୍ଚଳର ମତ୍ସ୍ୟଜୀବୀ ଓ ନୋଳିଆ ପରିବାରମାନଙ୍କ ଆର୍ଥିକ ତଥା ସାମାଜିକ ସ୍ଥିରତା ସୁନିଶ୍ଚିତ ହେବା ସହ ଛେଳିଗଡ଼ ପ୍ରକଳ୍ପ ଦ୍ୱାରା ପ୍ରଭାବିତ ପରିବାରମାନଙ୍କୁ ସେମାନଙ୍କର ବୈଧ ଜମି ଅଧିକାର ମିଳିପାରିବ।
ଡ଼ ପ୍ରଦୀପ୍ତ କୁମାର ମିଶ୍ର, ସ୍ବତନ୍ତ୍ର ପ୍ରତିନିଧି ଓଡ଼ିଶା
إرسال تعليق