ସମାଜସେବୀଙ୍କ ସ୍ମୃତିଚାରଣ ସଭା
ନୟାଗଡ଼ (ମଣିଭଦ୍ରା ଖବର) ନୟାଗଡ ଜିଲ୍ଲା ନାଗମୁଣ୍ଡଳି ଗ୍ରାମର ସମାଜସେବୀ ତଥା ଶ୍ରୀ ସତ୍ୟ ସାଇ ସଂଗଠନର ପୂର୍ବତନ ଜିଲ୍ଲା ସଭାପତି ସ୍ବର୍ଗତ ପ୍ରତାପ ଚନ୍ଦ୍ର ପରିଡ଼ାଙ୍କ ଏକାଦଶାହ ଉପଲକ୍ଷେ ବୁଧବାର ନାଗମୁଣ୍ଡଳି ଗ୍ରାମରେ ଏକ ସ୍ମୃତିଚାରଣ ସଭା ଅନୁଷ୍ଠିତ ହୋଇଛି। ଶ୍ରୀ ସତ୍ୟସାଇ ସଂଗଠନର ଜିଲ୍ଲା ସଭାପତି ପ୍ରତାପ ଚନ୍ଦ୍ର ଦେହୁରୀଙ୍କ ତତ୍ତ୍ଵାବଧାନରେ ଆୟୋଜିତ ସ୍ମୃତିଚାରଣ ସଭାରେ ଜିଲ୍ଲା ଆବାହକ ରାମଚନ୍ଦ୍ର ସାହୁ, ନକୁଳ ନାୟକ, ଖଦାଳ ଦିଣ୍ଡା, ଜଟାଧାରୀ ନାୟକ, କାର୍ତ୍ତିକ ନାୟକ, ରମେଶ ମହାରଣା, ସନ୍ତୋଷ ପ୍ରଧାନ, ଜୀବନ ଜ୍ୟୋତି ସାହୁ, ଶିକ୍ଷକ ରାଜ କିଶୋର ସାହୁ ଓ ଶରତ ଚନ୍ଦ୍ର ମାଝୀ ପ୍ରମୁଖ ସାଇ ଆଶ୍ରିତ ମାନେ ଉପସ୍ଥିତ ରହି ସ୍ବର୍ଗତ ପ୍ରତାପ ଚନ୍ଦ୍ର ପରିଡା କିପରି ସମାଜର ଗରୀବ ଲୋକଙ୍କୁ ସେବା, ସହାୟତା, ସାହାଯ୍ୟ କରିବା ସହ ଗ୍ରାମରେ ଏକ ଶିକ୍ଷାନୁଷ୍ଠାନ ଗଢି ଶିକ୍ଷାଦାନ କରିବା, ଲୋକ ମାନଙ୍କୁ ଭଲ ପାଇବା ଆଦି ସ୍ମୃତିଚାରଣ କରିଥିଲେ। ଏଥି ସହ ଭଜନ, ନାମ ସଙ୍କୀର୍ତ୍ତନ, ବେଦ ପାଠ ଗାନ କରି ସ୍ବର୍ଗତ ପ୍ରତାପ ଚନ୍ଦ୍ରଙ୍କ ଅମର ଆତ୍ମାର ସଦଗତି କାମନା କରିବା ସହ ଈଶ୍ୱର ତାଙ୍କୁ ଶାନ୍ତିରେ ରଖିଥାନ୍ତୁ ବୋଲି ପାର୍ଥନା କରିଥିଲେ। ଉକ୍ତ କାର୍ଯ୍ୟକ୍ରମରେ ରୋଟାରୀ କ୍ଲବ ନୟାଗଡ ଶାଖାର ପୂର୍ବତନ ସଭାପତି ପ୍ରବୀର କୁମାର ପୃଷ୍ଟି, ଶ୍ରୀ ରାମକୃଷ୍ଣ ଶିକ୍ଷା କେନ୍ଦ୍ରର ଅଧ୍ୟକ୍ଷ ଶ୍ରୀଧର ସାହୁ, ଜୀବନ ବୀମା ନୟାଗଡ ଶାଖା ପରିଚାଳକ, ଭୁବନେଶ୍ୱର ଶ୍ରୀ ସତ୍ୟସାଇ ଆନନ୍ଦମ୍ ର ଶିକ୍ଷକ ମାନେ ପ୍ରମୁଖ ଉପସ୍ଥିତ ରହି ସ୍ମୃତିଚାରଣ କରିଥିଲେ । ସ୍ବର୍ଗତ ପ୍ରତାପ ଚନ୍ଦ୍ର ଜଣେ ପରୋପକାରୀ, ସମାଜସେବୀ, ଧର୍ମପରାୟଣ ବ୍ୟକ୍ତିଥିଲେ। ଶ୍ରୀ ସତ୍ୟସାଇ ବାବାଙ୍କ ୧ଶହ ତମ ଜନ୍ମ ଜୟନ୍ତୀ ଉପଲକ୍ଷେ ସେ ଗତ ୧୪ତାରିଖରେ ନୟାଗଡ ଜିଲ୍ଲାର ୮୫ ଜଣ ସାଇ ଆଶ୍ରିତ ମାନଙ୍କୁ ନେଇ ଆନ୍ଧ୍ରପ୍ରଦେଶ ରାଜ୍ୟର ପ୍ରଶାନ୍ତିନୀଳୟମ (ପୁଟବର୍ତ୍ତୀ) ସ୍ଥିତ ବାବାଙ୍କ ଆଶ୍ରମକୁ ଯାଇଥିଲେ। ମାତ୍ର, ୧୬ତାରିଖ ରାତିରେ ହଠାତ୍ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ତୁରନ୍ତ ସୁପର ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ, କିଛି ସମୟ ପରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିଲେ। ତାଙ୍କ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳ ତଥା ନୟାଗଡ ଜିଲ୍ଲାରେ ଶୋକର ଛାୟା ଖେଳିଯାଇଛି।
إرسال تعليق