ବାତ୍ୟା ପାଇଁ ଭୟଭୀତ ଜନସାଧାରଣ,ବ୍ୟବସାୟୀ ମାଲେମାଲ,ସ୍ଥାଣୁ ପାଲଟିଛି ପ୍ରଶାସନ
ଗଣିଆ (ମଣିଭଦ୍ରା ଖବର) ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପ କ୍ଷେତ୍ର ସୃଷ୍ଟି ହୋଇ ଅବପାତରେ ପରିଣତ ହେବା ସହିତ ୨୩ ତାରିଖରେ ଏହା ବାତ୍ୟାର ରୂପ ନେବ । ୨୪ ତାରିଖରେ ଏହି ସମ୍ଭାବ୍ୟ ବାତ୍ୟା ଉପକୂଳ ଅତିକ୍ରମ କରିବାର ସମ୍ଭାବନା ଥିବା ବେଳେ ଏହାର ନାମ "ଦାନା " ରଖାଯାଇଛି । ୨୩ ତାରିଖରୁ ରାଜ୍ୟରେ ପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଏଥିପାଇଁ ସମସ୍ତ ବିଭାଗୀୟ ଅଧିକାରୀ ମାନେ ଆଲର୍ଟ ରହିବାକୁ ନିର୍ଦ୍ଦେଶ ଦିଆଯାଇଛି । କିନ୍ତୁ ଗଣିଆ ବ୍ଲକ ପ୍ରଶାସନ ଏକପ୍ରକାର ସ୍ଥାଣୁ ପାଲଟିଛି । ବାତ୍ୟା ପାଇଁ ପ୍ରଶାସନିକ ସ୍ତରରେ କୈାଣସି ପୂର୍ବ ପ୍ରସ୍ତୁତି ହୋଇନାହିଁ । ଗଣିଆ ରେ ୩ଟି ବାତ୍ୟା ଆଶ୍ରୟସ୍ଥଳୀ ଥିଲେ ମଧ୍ୟ ସେଠାରେ ଆନୁଷଙ୍ଗିକ ବ୍ୟବସ୍ଥା ନାହିଁ ।
ବାତ୍ୟାକୁ ଦୃଷ୍ଟିରେ ରଖି ପନିପରିବା ଠାରୁ ଆରମ୍ଭ କରି ନିତ୍ୟବ୍ୟବହାର୍ଯ୍ୟ ଦ୍ରବ୍ୟର ଦର ବୃଦ୍ଧି ପାଇବାରେ ଲାଗିଥିଲେ ମଧ୍ୟ ଯୋଗାଣ ବିଭାଗ ଚୁପ୍ ବସି ରହିଛି । କିଛି ଅସାଧୁ ବ୍ୟବସାୟୀ ଆଳୁ ପିଆଜର ଅହେତୁକ ଦର ବୃଦ୍ଧି କରିଥିଲେ ମଧ୍ୟ ଉପାୟଶୂନ୍ୟ ହୋଇ ଲୋକେ ଅଧିକ ମୂଲ୍ୟରେ କ୍ରୟ କରୁଛନ୍ତି । ଗଣିଆର ଅନେକ ଗ୍ରାମ ନଦୀକୂଳିଆ ହୋଇଥିବା ବେଳେ ବଣଜଙ୍ଗଲ ଘେରା ଅଞ୍ଚଳ ଭାବେ ପରିଗଣିତ । ଅନେକ ଗରୀବ ନିରିହ ଜନସାଧାରଣ କଚ୍ଚା ଘରେ ବାସ କରୁଥିଲେ ମଧ୍ୟ ସେମାନଙ୍କୁ ସ୍ଥାନାନ୍ତର କରିବା ପାଇଁ ପ୍ରଶାସନ ତରଫରୁ କୈାଣସି ବନ୍ଦୋବସ୍ତ କରାଯାଇନାହିଁ । ସରକାରଙ୍କ ତରଫରୁ ବିଭିନ୍ନ ପଦକ୍ଷେପ ନିଆଯାଇଥିଲେ ମଧ୍ୟ ଗଣିଆ ପ୍ରଶାସନ ନିରବଦ୍ରଷ୍ଟା ପାଲଟିଛି । ଜନସାଧାରଣଙ୍କୁ ସଚେତନ କରିବା ପାଇଁ ପ୍ରଚାର ପ୍ରସାର ମଧ୍ଯ ହୋଇ ପାରିନାହିଁ । ଯଦି କିଛି ବି ଅଘଟଣ ଘଟିବ ସେଥିପାଇଁ କିଏ ଦାୟୀ ରହିବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଚାଲିଛି ।
ବ୍ୟୁରୋ ରିପୋର୍ଟ ମଣିଭଦ୍ରା ଖବର
إرسال تعليق