କିଶୋର ପ୍ରସାଦରେ ନଳକୂପ ଅଚଳ, ଅଭିଯୋଗ କଲେ କେହି ଶୁଣୁ ନାହାନ୍ତି
ଗଣିଆ (ମଣିଭଦ୍ରା ଖବର) ଗଣିଆ ବ୍ଲକ କିଶୋର ପ୍ରସାଦ ପଞ୍ଚାୟତର ବିଭିନ୍ନ ଗ୍ରାମରେ ନଳକୂପ ଅଚଳ ହୋଇ ପଡିରହିଛି । ବାରମ୍ବାର ଅଭିଯୋଗ କଲେ ମଧ୍ୟ ବିଭାଗୀୟ ଅଧିକାରୀଙ୍କ ନିଦ ଭାଙ୍ଗୁନି । ଏପରିକି ୧୨ ଦିନ ହେବ ନିଜେ ସରପଞ୍ଚ ଏନେଇ ଅଭିଯୋଗ କରିଥିଲେ ମଧ୍ୟ କେହି ଶୁଣୁ ନାହାନ୍ତି । ତେବେ ବାଧ୍ୟହୋଇ ସରପଞ୍ଚଙ୍କ ପ୍ରତିନିଧି ବିଜୟ କୁମାର ବେହେରା ବିଭିନ୍ନ ସୋସିଆଲ ମିଡ଼ିଆ ଗ୍ରୁପରେ ଜଣାଇବା ସହିତ ତୁରନ୍ତ ନଳକୂପ ସଜାଡିବାକୁ ନିବେଦନ କରିଛନ୍ତି । ଉକ୍ତ ପଞ୍ଚାୟତର ପୂର୍ଣ୍ଣଚନ୍ଦ୍ରପୁର,ପାଣ୍ଡରା ସିଙ୍ଗା ଏବଂ ପତଣ୍ଡା ହରିଜନ ସାହିରେ ଦୀର୍ଘ ଦିନ ହେବ ନଳକୂପ ଅଚଳ ହୋଇ ପଡିରହିଛି । ଗ୍ରାମବାସୀ ମାନେ ପାଣିଟୋପେ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏନେଇ ବାରମ୍ବାର ଅଭିଯୋଗ କଲେ ମଧ୍ୟ ବିଭାଗୀୟ ଅଧିକାରୀଙ୍କ ଅପାରଗତା ଯୋଗୁଁ ନଳକୂପ ମରାମତି ହୋଇ ପାରୁ ନାହିଁ । ସରକାର ପ୍ରତ୍ୟେକ ସୋମବାର ବ୍ଳକରେ ଜନଶୁଣାଣୀ କରୁଥିବା ବେଳେ ପାନୀୟ ଜଳ ଯୋଗାଣ ବିଭାଗ କଣ କରୁଛି ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି । ଜଣେ ସରପଞ୍ଚଙ୍କ ଅଭିଯୋଗ ପରେ ମଧ୍ୟ କାର୍ଯ୍ୟକାରୀ ହେଉନାହିଁ ବୋଲି ସେ ସୋସିଆଲ ମିଡ଼ିଆର ସାହାର ନେଉଛନ୍ତି ତେବେ ସାଧାରଣ ଜନତାଙ୍କ ଅବସ୍ଥା କେମିତି ବୋଲି ସାଧାରଣରେ ଚର୍ଚ୍ଚା ଜୋର ଧରିଛି ।
ମଣିଭଦ୍ରା ଖବର, ଗଣିଆ
إرسال تعليق