ରଘୁନାଥ ଜୀଉ ମନ୍ଦିର ପରିସରରେ ଆଖଡା ପୂଜା ଆରମ୍ଭ
ଗଣିଆ (ମଣିଭଦ୍ରା ଖବର) ଗଣିଆ ରଘୁନାଥ ଜୀଉ ମନ୍ଦିର ପରିସରରେ ଚଳିତ ବର୍ଷ ରାମଲୀଳା ଯାତ୍ରା ପାଇଁ ଆଖଡା ପୂଜା ଆରମ୍ଭ ହୋଇଛି । ଚଳିତ ବର୍ଷ ମାର୍ଚ୍ଚ ମାସର ୨୭ ତାରିଖରେ ରାମନବମୀ ପଡୁଥିବାରୁ ଏଥିପାଇଁ ପ୍ରସ୍ତୁତି ପର୍ବ ଆରମ୍ଭ ହୋଇଯାଇଛି । ମାର୍ଚ୍ଚ ୨୭ରେ ରାମନବମୀ ଉତ୍ସବ ଆରମ୍ଭ ହେବା ସହିତ ଅପ୍ରେଲ ୨୧ ତାରିଖରେ ମୁଖ୍ୟ ଉତ୍ସବ ରାବଣ ବଧ ବା ଲଙ୍କାପୋଡି ଯାତ୍ରା ଅନୁଷ୍ଠିତ ହେବ ବୋଲି ଆପାତତଃ ସ୍ଥିର ହୋଇଛି । ରଘୁନାଥ ଜୀଉ ମନ୍ଦିର ପରିଚାଳନା କମିଟିର ସମସ୍ତ ସଦସ୍ୟ ତଥା ରାମଳୀଳାରେ ଅଂଶ ଗ୍ରହଣ କରୁଥିବା ସମସ୍ତ କଳାକାରଙ୍କ ଉପସ୍ଥିତିରେ ପ୍ରଭୁ ଶ୍ରୀରଘୁନାଥ ଜୀଉଙ୍କ ଠାରେ ପୂଜାର୍ଚ୍ଚନା ହୋଇଥିଲା । ପୁରାଣ ପାଠକ ସାନୁଜରାମ ମିଶ୍ର ପୁରାଣ ଅନୁକୂଳ କରିଥିଲେ । ଶ୍ରୀରାମ ବନ୍ଦନା ସହିତ ରାମଜନ୍ମ ନାଟକ ଆଖଡା ଆରମ୍ଭ ହୋଇଥିଲା । ପରିଚାଳନା କମିଟିର ସମ୍ପାଦକ ଉଦ୍ୟନାଥ ସାହୁ, ସୁଶାନ୍ତ କୁମାର ବେହେରା,ଆନନ୍ଦ ଚନ୍ଦ୍ର ବେହେରାଙ୍କ ସମେତ ଯାତ୍ରା କମିଟିର ସମସ୍ତ ସଦସ୍ୟ ଉପସ୍ଥିତ ଥିଲେ ।
ମଣିଭଦ୍ରା ଖବର, ଗଣିଆ
إرسال تعليق