ଚାକିରି ଆଶାୟୀଙ୍କ ପାଇଁ ଖୁସିଖବର
(ଏଣିକି ବର୍ଷରେ ଏକାଧିକ ଥର ନିଯୁକ୍ତି ପରୀକ୍ଷା)
ଭୁବନେଶ୍ୱର,:ଏଣିକି ବର୍ଷକୁ ଥରେ ବଦଳରେ ଏକାଧିକ ଥର ନିଯୁକ୍ତି ପରୀକ୍ଷା ହେବ । ‘ମିଳିତ ସ୍ନାତକସ୍ତର ନିଯୁକ୍ତି ପ୍ରକ୍ରିୟା ନିୟମାବଳୀ-୨୦୨୨’ରେ ଏକ ବଡ଼ ସଂଶୋଧନ ସହ ପଦବୀ ସଂଖ୍ୟା ମଧ୍ୟ ବୃଦ୍ଧି କରାଯାଇଛି । ରାଜ୍ୟ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଚାକିରି ଆଶାୟୀ ଯୁବବର୍ଗଙ୍କ ପାଇଁ ଖୁସିଖବର । ଏଣିକି ବର୍ଷକୁ ଥରେ ବଦଳରେ ଏକାଧିକ ଥର ନିଯୁକ୍ତି ପରୀକ୍ଷା ହେବ । ‘ମିଳିତ ସ୍ନାତକସ୍ତର ନିଯୁକ୍ତି ପ୍ରକ୍ରିୟା ନିୟମାବଳୀ-୨୦୨୨’ରେ ଏକ ବଡ଼ ସଂଶୋଧନ ସହ ପଦବୀ ସଂଖ୍ୟା ମଧ୍ୟ ବୃଦ୍ଧି କରାଯାଇଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି । ନିଯୁକ୍ତି ସହ ଜଡ଼ିତ ସାଧାରଣ ପ୍ରଶାସନ ବିଭାଗର ୩ଟି ପ୍ରସ୍ତାବକୁ ଆଜି କ୍ୟାବିନେଟ୍ ଅନୁମୋଦନ କରିଛନ୍ତି । କ୍ୟାବିନେଟ୍ ନିଷ୍ପତ୍ତି ଫଳରେ ରାଜ୍ୟରେ ଚାକିରି ଆଶାୟୀଙ୍କୁ ଅଧିକ ସୁବିଧା ମିଳିବ ।
ବର୍ଷକୁ ଥରେ ନୁହେଁ ଏକାଧିକ ଥର ହେବ ନିଯୁକ୍ତି ପରୀକ୍ଷା
ରାଜ୍ୟ ସରକାରଙ୍କ ଅଧୀନସ୍ଥ ଖ-ବର୍ଗ ଓ ଗ-ବର୍ଗର ବିଭିନ୍ନ ପଦବୀରେ ନିଯୁକ୍ତି ପାଇଁ ଥିବା ‘ମିଳିତ ସ୍ନାତକ ସ୍ତର ନିଯୁକ୍ତି ପ୍ରକ୍ରିୟା ନିୟମାବଳୀ- ୨୦୨୨\'ରେ ସଂଶୋଧନକୁ କ୍ୟାବିନେଟ୍ ଅନୁମୋଦନ କରିଛନ୍ତି । ପୂର୍ବରୁ ଓଡ଼ିଶା ଷ୍ଟାଫ ସିଲେକ୍ସନ ଆୟୋଗ (ଓଏସଏସସି) କେବଳ ପ୍ରତିବର୍ଷ ଥରେ ମାତ୍ର ବିଜ୍ଞପ୍ତି ପ୍ରକାଶ କରି ମିଳିତ ନିଯୁକ୍ତି ପରୀକ୍ଷା ପରିଚାଳନା କରୁଥିଲେ । ମାତ୍ର ବର୍ତ୍ତମାନର ସଂଶୋଧନ ଅନୁଯାୟୀ, ପ୍ରଥମ ବିଜ୍ଞପ୍ତି ପ୍ରକାଶ ପାଇବା ପରେ ଯଦି ସେହି କ୍ୟାଲେଣ୍ଡର ବର୍ଷରେ ଆୟୋଗ ପାଖରେ ଅଧିକ ପଦବୀ ନିଯୁକ୍ତି ପାଇଁ ରିକ୍ୟୁଜିସନ୍ ଆସେ, ସରକାରଙ୍କ ଅନୁମୋଦନ କ୍ରମେ ଆୟୋଗ ଆଉ ଏକ ବିଜ୍ଞପ୍ତି ପ୍ରକାଶ କରିପାରିବେ । ଏହି ନିଷ୍ପତ୍ତି ନିଯୁକ୍ତି ପ୍ରକ୍ରିୟାକୁ ତ୍ୱରାନ୍ୱିତ କରିବାରେ ସହାୟକ ହେବ।
ମିଳିତ ସ୍ନାତକ ସ୍ତର ନିଯୁକ୍ତିରେ ୨୪ ପଦବୀ
ମିଳିତ ସ୍ନାତକ ସ୍ତର ନିଯୁକ୍ତି ନିୟମାବଳୀରେ (ଗ୍ରୁପ-ବି, ଗ୍ରୁପ-ସି) ଆହୁରି ୪ ଗୋଟି ନୂତନ ପଦବୀକୁ ସାମିଲ କରିବାକୁ କ୍ୟାବିନେଟ୍ ଅନୁମୋଦନ ଦେଇଛି । ଏହାପୂର୍ବରୁ ଏହି ରୁଲସରେ ମୋଟ୍ ୨୦ ଗୋଟି ଭିନ୍ନ ଭିନ୍ନ ପଦବୀ ସାମିଲ୍ ଥିଲା । ଏହି ସଂଶୋଧନ ପରେ ଓଡ଼ିଶା ଷ୍ଟାଫ ସିଲେକ୍ସନ ଆୟୋଗ (ଓଏସଏସସି) ସର୍ବମୋଟ ୨୪ ଗୋଟି ପଦବୀକୁ ଗୋଟିଏ ମିଳିତ ପରୀକ୍ଷାରେ ପରିଚାଳିତ କରିପାରିବ ।
ସ୍ୱତନ୍ତ୍ର ସେବା ସ୍ନାତକସ୍ତରରେ ମୋଟ ୩୯ ପଦବୀ
ରାଜ୍ୟ ସରକାରଙ୍କ ଅଧୀନସ୍ଥ ଖ-ବର୍ଗ ଓ ଗ-ବର୍ଗ ଅନ୍ତର୍ଗତ ସ୍ୱତନ୍ତ୍ର ସେବା ଓ ପଦବୀ ପାଇଁ ଥିବା ‘ମିଳିତ ସ୍ନାତକ ସ୍ତର ନିଯୁକ୍ତି ପ୍ରକ୍ରିୟା ନିୟମାବଳୀ, ୨୦୨୨\'ରେ ସଂଶୋଧନ ହୋଇଛି । ଏହି ନିୟମାବଳୀର ସିଡ୍ୟୁଲ-୧ ରେ ୧୪ ଗୋଟି ନୂଆ ପଦବୀକୁ ଅନ୍ତର୍ଭୁକ୍ତ କରାଯିବ । ଏହା ସହିତ ପୂର୍ବରୁ ଥିବା ୪ଟି ପଦବୀକୁ ବାଦ୍ ଦିଆଯିବ । ଏହି ନିଷ୍ପତ୍ତି ଫଳରେ ଓଡ଼ିଶା ଷ୍ଟାଫ ସିଲେକ୍ସନ ଆୟୋଗ (ଓଏସଏସସି) ମିଳିତ ସ୍ନାତକସ୍ତର ନିଯୁକ୍ତି ପରୀକ୍ଷାରେ ମୋଟ ୩୯ ଗୋଟି ସ୍ୱତନ୍ତ୍ର ପଦବୀକୁ ପରିଚାଳିତ କରିପାରିବ । ପୂର୍ବରୁ ଏହି ସଂଖ୍ୟା ୨୯ ଥିଲା ।
ଉଚ୍ଚ ମାଧ୍ୟମିକସ୍ତରରେ ନୂଆ ପଦବୀ ସାମିଲ
ଉଚ୍ଚ ମାଧ୍ୟମିକ (୧୦+୨) ସ୍ତର କିମ୍ବା ସମାନ ସ୍ତର ଅଧୀନସ୍ଥ ସ୍ୱତନ୍ତ୍ର ସେବା ଓ ପଦବୀ ପାଇଁ ମିଳିତ ନିଯୁକ୍ତି ପରୀକ୍ଷା ନିୟମାବଳୀ, ୨୦୨୨ ରେ ମଧ୍ୟ ସଂଶୋଧନ ହୋଇଛି । ଏହି ନିୟମ ଅନୁଯାୟୀ, ସ୍ୱରାଷ୍ଟ୍ର ବିଭାଗର ଷ୍ଟେଟ ଫୋରେନ୍ସିକ ସାଇନ୍ସ ଲାବ (ଏସଏଫଏଏଲ) ଅଧୀନରେ ଥିବା ଜୁନିୟର ଫରେନ୍ସିକ ଆଟେଣ୍ଡାଣ୍ଟ ପଦବୀକୁ ସିଡ୍ୟୁଲ-୧ ରେ ଅନ୍ତର୍ଭୁକ୍ତ କରାଯାଇଛି । ଫଳରେ ଓଏସଏସସି ଏବେ ସର୍ବମୋଟ ୧୨ ଗୋଟି ଭିନ୍ନ ପଦବୀକୁ ଏକ ମିଳିତ ପରୀକ୍ଷାରେ ପରିଚାଳିତ କରିପାରିବ । ପୂର୍ବରୁ ଏହି ସଂଖ୍ୟା ୧୧ ଥିଲା ।
ଡ଼ ପ୍ରଦୀପ୍ତ କୁମାର ମିଶ୍ର, ସ୍ବତନ୍ତ୍ର ପ୍ରତିନିଧି ଓଡ଼ିଶା
إرسال تعليق