୧୦ ଜିଲ୍ଲାକୁ ୧୫ ଦିନ ରିଲିଫ ଘୋଷଣା କଲେ ମୁଖ୍ୟମନ୍ତ୍ରୀ, ବାଦ୍ ପଡିଲା ନୟାଗଡ ଜିଲ୍ଲା
ଭୂବନେଶ୍ବର (ମଣିଭଦ୍ରା ଖବର) ବନ୍ୟାଞ୍ଚଳ ପରିଦର୍ଶନ ପରେ ୧୦ ଜିଲ୍ଲାକୁ ୧୫ ଦିନ ପାଇଁ ରିଲିଫ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେଥିମଧ୍ୟରୁ ୫ ଜିଲ୍ଲାକୁ ୧୫ ଦିନ ଏବଂ ୫ ଜିଲ୍ଲାକୁ ୭ ଦିନ ପାଇଁ ରିଲିଫ ପ୍ରଦାନ କରିବାକୁ ସେ ନିର୍ଦ୍ଦେଶ ଦେଇଛନ୍ତି । ଖୋର୍ଦ୍ଧା, ପୁରୀ, କଟକ, କେନ୍ଦ୍ରାପଡ଼ା, ଜଗତସିଂହପୁର ଜିଲ୍ଲାକୁ ୧୫ ଦିନ ପାଇଁ ଏବଂ ସମ୍ବଲପୁର,ବରଗଡ଼, ସୋନପୁର,ବୈଦ୍ଧ, ଅନୁଗୁଳ ଜିଲ୍ଲାକୁ ୭ ଦିନ ପାଇଁ ରିଲିଫ ବଣ୍ଟନ କରାଯିବା ପାଇଁ ନିଷ୍ପତ୍ତି ଗ୍ରହଣ କରାଯାଇଛି । ବନ୍ୟା କ୍ଷୟକ୍ଷତି ଆକଳନ କରି ୭ ଦିନ ଭିତରେ ରିପୋର୍ଟ ଦେବା ସହିତ ୧୫ ଦିନ ଭିତରେ ସହାୟତା ପ୍ରଦାନ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ତେବେ ନୟାଗଡ ଜିଲ୍ଲାର ଗଣିଆ, ଭାପୁର ଏବଂ ଖଣ୍ଡପଡ଼ା ବ୍ଳକରେ ଗତ ୪ ଦିନ ଧରି ବନ୍ୟା ଜଳରେ ଲୋକେ ଜଳବନ୍ଦୀ ଅବସ୍ଥାରେ ରହିଥିବା ବେଳେ ହଜାର ହଜାର ହେକ୍ଟର ଚାଷଜମି ଜଳମଗ୍ନ ହୋଇ ରହିଛି । ପନିପରିବା ଫସଲ ପାଣିରେ ବୁଡ଼ି ପଚି ଯାଇଛି । ଗଣିଆ ବ୍ଳକର ୪୧ଟି ଗ୍ରାମ ବନ୍ୟାରେ କ୍ଷତିଗ୍ରସ୍ତ ହୋଇଥିବା ବେଳେ ରିଲିଫ ପାଇବାରୁ ନୟାଗଡ ଜିଲ୍ଲାକୁ ବାଦ୍ ଦେବା ଫଳରେ ଲୋକଙ୍କ ମନରେ ଅସନ୍ତୋଷ ଦେଖାଦେଇଛି । ସେହିପରି ଜିଲ୍ଲାର ଭାପୁର,ଖଣ୍ଡପଡ଼ା ବ୍ଳକରେ ସ୍ଥିତି ଗୁରୁତର ହୋଇଥିଲେ ମଧ୍ୟ ମୁଖ୍ୟମନ୍ତ୍ରୀ କାହିଁକି ନୟାଗଡ ଜିଲ୍ଲାକୁ ରିଲିଫ ଦେବାରୁ ବଞ୍ଚିତ କରିଛନ୍ତି ତାହା ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ତେବେ ତୁରନ୍ତ ନୟାଗଡ ଜିଲ୍ଲାରେ ରିଲିଫ ବଣ୍ଟନ କରିବାକୁ କ୍ଷତିଗ୍ରସ୍ତ ଲୋକେ ଦାବି କରିଛନ୍ତି । ମୁଖ୍ୟମନ୍ତ୍ରୀ ନେଇଥିବା ନିଷ୍ପତିର ପୁନର୍ବିଚାର କରିବାକୁ ବୁଦ୍ଧିଜୀବୀ ମହଲରେ ଚର୍ଚ୍ଚା ଚାଲିଛି । ମୁଖ୍ୟମନ୍ତ୍ରୀଙ୍କ ଏଭଳି ଟାଳଟୁଳ ନୀତିକୁ ସମାଲୋଚନା କରିଛନ୍ତି ବିରୋଧୀ କଂଗ୍ରେସ ଏବଂ ବିଜେପି ।
ବ୍ୟୁରୋ ରିପୋର୍ଟ ମଣିଭଦ୍ରା ଖବର
Post a Comment